今日，香港有得賣新款iPhone，但係全香港幾份所謂大報都用唔少篇幅去報導「水貨減價迎戰」，我真係覺得好奇怪，明明Apple HK 標明價錢網上直接有得買，只係要click兩click就搵得到o既料都唔報，係要一而再，再而三地幫水貨佬講大話？

Apple 網上直購價：16G $5388, 32G $6288 ，唔需要跟任何約，無鎖，24小時內送上門，仲有得Citibank分期。(下午14:3更新，已經變成要等5-7日送貨，賣得好快。)

 呢篇蘋果o既報導：「手機水貨商昨日馬上減價迎擊。先達廣場手機店 G-World Mobile負責人劉志剛表示， iPhone 3GS水貨機即時減價一成， 16GB及 32GB美國版手機分別售 5,980元及 6,980元，歐洲版分別售 7,280元及 8,280元，「水貨機銷情幾好，過去一星期賣咗 50幾部。」他說不擔心行貨搶客，「要簽成兩年約，唔係咁多人願意。」」

呢篇明報都係問同一鋪頭，e-Zone568期又係同一個人。

行貨，根本唔洗簽約，水貨又貴，一係要JailBreak(即解鎖)，保証無保養，買黎做乜？我寫包單水貨佬根本無零件整，除左搵水魚之外，正常人邊會幫佢買？不過，一般人如果只係睇報紙而唔上網自己搵o野的話，好明顯會做水魚。問題係明明網上面清清楚楚，點解記者要幫水貨佬出貨同作出選擇性報導？

而且，係一堆紙上傳媒而唔係一份半份，如果話係有利益衝突的話，只會有一個可能性，「懶」！

一般高科技電子產品廠商貨物出門之前都會作某一程度信息控制，而報導呢類手機/2C新聞記者始終都係同一班人，呢班人往往因為求快、貪方便而走到某一兩個水貨佬度搵料，水貨佬有機會做免費宣傳當然樂意供料。當然，水貨佬往往只有拆貨佬供應o既二手資料，所以往往報紙雜誌上面「新機資訊」都係錯漏百出，再加編輯把關不力(亦可能無能為力)，而養成一班喝水貨佬奶水大o既懶蟲。

既然網上有免費第一手資料報導，又準又快，大家不妨唔好再浪費無謂o既錢去買o的二手垃圾報紙、雜誌。