又話八點半開波，好，信埋你呢次，點知又搞到差唔多三點先打....朝早都驚死遲到，六點三就出門，未夠八點食埋早餐，上到去已經覺得唔多對路。九點幾先開幕式，仲要慢慢搞新意思....

熱身頭尾四次，一次比一次更攰更硬，又要理場邊o的濕碎o野，又唔肯定幾時打，仲唔可以用個大空位熱身，場邊素振時有人行過又危險，都唔知點好。

人人食午飯反應都唔同，我人賤，食飯會飯氣攻心，所以未打又唔食得飯，十二點食隻蕉頂到兩點幾乜都無，驚死自己呆到恰著邊黎幫手做o的o野，結果都係冷到手腳硬晒。(我打晒底再加風褸都唔掂。)

唔計交通都等成六個半鐘先有得打，如果大約知幾點打都可以場邊閉目養神呀，成日都話就到就到，一路緊張緊張，緊到最後咪又巢晒皮？一早幾好精神到下午乜都呆晒啦。

以後我都係做大爺算。

後記：估唔到呢一篇悔氣說話o既「個人感覺」被抬上去Facebook公開鞭屍，連自己一個小小o既私人角落呻兩句要搞到珠港澳都知道，打電話俾主事者仲要被人cut線，似乎佢真係唔知Facebook 有幾大影響力，我唔介意佢分唔清文字上「吐嘈(呻)」同「責難(鬧)」o既分別，但係一抬上去facebook鬧就無得返轉頭。

算啦，怪佢等於激自己。